Մեր թիմի կողմից մշակված «Երաշխավորված խաղաղություն» ծրագրի հիմնական սկզբունքներից մեկը, որը ձևավորվեց «Առաջարկ Հայաստանին» նախաձեռնության հետ քննարկումների արդյունքում, խաղաղության հասնելու նոր մոտեցում է։ Մենք պետք է հրաժարվենք ներկայիս վիճակից, որը բնութագրվում է անվստահությամբ, սպառնալիքներով և պարբերական զիջումներով։
Ընտրությունը խաղաղության և պատերազմի միջև չէ։ Դա ընտրություն է երաշխավորված, կայուն խաղաղության և անվստահելի, պայմանական հրադադարի միջև։ Որևէ համաձայնություն, որը չի ունենա միջազգային իրավական հիմք և հստակ երաշխավորներ, խոցելի է։
Մեր թիմը առաջ է մղում «Երաշխավորված խաղաղություն» գաղափարը, որը նախատեսում է պայմանավորվածությունների համակարգ, որը կամրագրված է միջազգային իրավական մեխանիզմներով և ապահովված է վերահսկողության և պատասխանատվության հստակ գործիքներով։
Հայաստանը պետք է հավատարիմ մնա իր պարտավորություններին, սակայն միևնույն ժամանակ անդադար զարգացնի իր ներուժը՝ տարածաշրջանում իր կշիռը մեծացնելու համար։ Անվտանգության երաշխիքներ ստեղծելու համար անհրաժեշտ է աշխատել նոր դաշնակիցների հետ՝ հիմնվելով իրատեսական, փոխշահավետ հարաբերությունների վրա։
Մեր անվտանգությունը չպետք է հիմնվի հակադրությունների վրա, այլ՝ փոխլրացման, շահերի համընկման և աշխարհաքաղաքական կամուրջների սկզբունքի վրա։
Տնտեսական անվտանգություն. Խաղաղության հիմքը
Ես ուզում եմ խոսել տնտեսական անվտանգության մասին։ Այն ոչ միայն ազգային անվտանգության հիմքն է, այլև կայուն դիվանագիտության, հուսալի պաշտպանության և լիարժեք ինքնիշխանության հիմքը։
Պետք է հասկանալ մեր տնտեսության կառուցվածքը, բիզնեսի տրամաբանությունը և աշխատատեղերի ստեղծման բարդ մեխանիզմները։ Գեղեցիկ խոսքերով և սուտ հույսերով մոլորեցնել մեր ժողովրդին անթույլատրելի է։ Ազնվությունը պահանջում է ընդունել, որ ԵԱՏՄ շուկան այս պահին իրատեսական այլընտրանք չունի։ Մենք պետք է օգտվենք այդ հնարավորություններից, ոչ թե քանդենք եղածը։
ԵԱՏՄ շրջանակներում մենք ունենք զարգանալու մեծ ռեսուրս։ Դրան զուգահեռ կարիք ունենք նոր տեխնոլոգիաների, և այստեղ Արևմուտքի հետ գործակցությունը (ԵՄ, ԱՄՆ) չափազանց կարևոր է։ Տեխնոլոգիաների և ներդրումների առումով մենք զարգանալու հսկայական պոտենցիալ ունենք նաև Չինաստանի հետ հարաբերություններում։ Հնդկաստանի, ինչպես նաև արաբական աշխարհի հետ ունենք ահռելի աշխատանքի և «աշխարհատնտեսական բարեկամության» դաշտ։ Այս բոլոր ուղղություններով անհրաժեշտ է գրագետ և նպատակային աշխատանք։
Ինքնիշխանություն և կայունություն
Խաղաղությունը երաշխավորվում է ներքին ամրությամբ, ներքին համերաշխությամբ, առողջ դիվանագիտությամբ, խելամիտ պաշտպանական համակարգով, տնտեսական ու դաշնակցային բազմակողմանի և արդյունավետ գործակցությամբ, ու հասարակության բոլոր շերտերի հետ ազնիվ ու կառուցողական աշխատանքով։
Երաշխավորված խաղաղությունը մի վիճակ է, երբ մարդը իր կյանքը ծրագրում է ոչ թե մեկ ամսվա, այլ՝ տարիների կտրվածքով, երբ ծնողները հանգիստ մտածում են իրենց երեխաների ապագայի մասին, երբ երիտասարդները մտածում են հայրենիքում մնալու, կայանալու և ընտանիք կազմելու մասին, երբ գործարարը ներդրում է կատարում՝ վստահ լինելով կանխատեսելիության մեջ, երբ զինվորը վստահ է, որ իր թիկունքում կա ոչ միայն զենք, այլև՝ ուժեղ տնտեսություն, պրոֆեսիոնալ դիվանագիտություն և համախմբված հասարակություն։
Երաշխավորված խաղաղությունը Հայաստանի վերականգնման, ազգային վերածննդի առանցքային գաղափարն է, որը ենթադրում է բոլոր կարող ուժերի և անհատների միասնական, նվիրված, գրագետ աշխատանքը։ Ես համոզված եմ, որ Հայաստանը կարող է անցնել այս ճանապարհով։